ސައްހަ ވިސާއާ ނުލައި މަސައްކަތް ކުރަމުންދިޔަ އިތުރު ބިދޭސީއަކު އަތުލައިގެންފިއެވެ.
އިމިގްރޭޝަނުން މިއަދު ހާމަކޮށްފައިވާ ގޮތުގައި ގަވާއިދާ ހިލާފަށް ވިޔަފާރި ކުރަމުންދާ ބިދޭސީން ހޯދުމަށް ކުރަމުންދާ މަސައްކަތުގެ ތެރެއިން، ޓާސްކުފޯހުން ވަނީ ރޭ މާލޭގައި ރެއިޑް އޮޕަރޭޝަނެއް ކުރިއަށްގެންގޮސްފައެވެ.
މިގޮތުން މި އޮޕަރޭޝަންގައި ވަނީ މާލެ ސަރަހައްދުގައި ބިދޭސީން ވިޔަފާރި ކުރަމުންދިއަ ތަނެއް ބަލައި ފާސްކޮށް، ސައްހަ ވިސާއެއްނެތި ގަވާއިދާ ހިލާފަށް މަސައްކަތް ކުރަމުންދިއަ ބިދޭސީއެއް އެ މުއައްސަސާގެ ބެލުމުގެ ދަށަށް ގެނެސްފައެވެ.
ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ގިނަ މަސައްކަތްތައް ކުރަމުންނެވެ. މިގޮތުން މާލޭގެ އެކި ސަރަހައްދުގައި ހިންގި ގިނަ އޮޕަރޭޝަންތަކުގައި ގަވާއިދާ ޚިލާފަށް އުޅޭ އެތައް ބިދޭސީންތަކެއް ވަނީ އަތުލައިގެންފައެވެ.
މިގޮތުން އިމިގްރޭޝަނުން ވަނީ ބިދޭސީންގެ ބޮޑު ކޮންޓްރޯލެއް އޮންނަކަމަށް، އަބަދުވެސް އާއްމުންގެ ފަރާތުން ކަންބޮޑުވުން ލިބެމުން އަންނަ ސަރަހައްދެއް ކަމުގައިވާ، ހީނާމާގެ ޕާކިންގް ސަރަހައްދަށް އަމާޒުކޮށްގެން އާދީއްތަ ދުވަހު ހިންގި އޮޕަރޭޝަނެއްގައި އެ ސަރަހައްދަށް އެއްވެއުޅޭ ބިދޭސީންނާއި އެ ސަރަހައްދުގައި ބިދޭސީން އިސްވެ ތިބެ ހިންގަމުންދާ ފިހާރަ، ކެފޭ ފަދަ ތަންތަން ބަލައި ފާސްކޮށް، ސައްހަ ވިސާއެއްނެތި ގަވާއިދާ ހިލާފަށް މަސައްކަތް ކުރަމުންދާ 17 ބިދޭސީއަކު ހައްޔަރުކޮށްފައެވެ.
މާލޭގެ އިތުރުން އަތޮޅުތެރޭގެ ރަށްތަކަށްވެސް މި އޮޕަރޭޝަންތައް ފުޅާކުރާނެ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން، ޝަމްޢާން ވަޙީދު ވަނީ މީގެ ކުރިން ވިދާޅުވެފައެވެ.
މި ލިޔުން ކިޔާލުމުން
