ށ.ނަރުދޫގެ ފެނާއި ނަރުދަމާގެ މަޝްރޫއުއަށް ޚާއްސަ އިސްކަމެއްދީ، އެކަން ހައްލުކޮށްދިނުމަށް އެ ރަށު ކައުންސިލުން ސަރުކާރަށް ގޮވައިލައިފިއެވެ.
މި މަޝްރޫއުގެ މަސައްކަތްތައް ހުއްޓިފައިވާތީ ނެރުނު ބަޔާނެއްގައި ނަރުދޫ ކައުންސިލުން ބުނީ 29 ސެޕްޓެމްބަރ 2019 ގައި ހަވާލުކޮށް، 28 ސެޕްޓެމްބަރ 2021 ގައި ނިންމާ ގޮތަށް ހަވާލުކޮށްފައިވާ ނަރުދޫގެ ފެނާއި ނަރުދަމާ ނިޒާމު ގާއިމު ކުރުމާ ބެހޭ މަޝްރޫއުގެ އަމަލީ މަސައްކަތް ފަށާފައިވަނީ 2021 ގެ ކުރީކޮޅުގައި ކަމަށެވެ.
ނަރުދޫ ކައުންސިލުން ބުނީ މި މަސައްކަތް ހުއްޓި ގިނަ ދުވަސް ވެފައިވާތީ، މަސައްކަތް ކުރުމަށް ގެނެސްފައިހުރި ކޮންސްޓްރަކްޝަން މެޓީރިއަލްސް ބޭނުން ނުކުރެވޭ ވަރަށް ހަލާކުވެ، ތަކެތި ވީރާނާވެ އެތަކެތި ވަނީ ބޭނުން ނުކުރެވޭ ހާލަތަށް ގޮސްފައިވާ ކަމަށެވެ. އަދި އޭގެ ސަބަބުން ރަށުގައި ދިރިއުޅޭ ރައްޔިތުންނަށް ވަރަށް ބޮޑެތި ދަތިތަކާއި އުނދަގޫތައް ކުރިމަތިވަމުންދާކަން ފާހަގަކުރެވޭ ކަމަށެވެ.
މި މައުލޫމާތު އެތައް ގޮތަކަށް އެތައް ފަހަރެއްގެ މަތިން ވާނީ މަސައްކަތް ހަވާލުކޮށްފައިވާ ފަރާތާއި، ސަރުކާރުގެ ކަމާގުޅުންހުރި އިދާރާތަކަށް އެންގިފައި ކަމަށާއި، އާ ސަރުކާރު ހަވާލުވި ފަހުން އަހަރަށްކަވުރެ ގިނަ ދުވަސް ފާއިތުވެގެން ދިޔައިރު، އިތުރު ފަރާތަކާއި މަސައްކަތް ހަވާލު ކުރިކަމުގެ އެއްވެސް މައުލޫމާތެއް ރަސްމީ އެއްވެސް ގޮތަކުން އެ އިދާރާއަށް އެނގިފައި ނެތުމުން ކަންބޮޑުވާ ކަމަށް ވެސް ނަރުދޫ ކައުންސިލުން ބުންޏެވެ.
ކައުންސިލުން ބުނީ މަސައްކަތް ނިންމަން ފުރަތަމަ ހަވާލުކުރި މުއްދަތަށް ނިމިފައި ނުވާތީ، ދެވަނަ ފަހަރަށް 28 ސެޕްޓެމްބަރ 2021 އިން 28 ސެޕްޓެމްބަރު 2022 ގެ ނިޔަލަށް މަސައްކަތް ނިންމާ ގޮތަށް މަސައްކަތް ހަވާލުކުރެއްވި ނަމަވެސް އެ މަސައްކަތް ފެށިފައިނުވާ ކަމަށެވެ.
އެގޮތުން މި މަޝްރޫއުގެ ސަބަބުން ކުރިމަތިވަމުންދާ މައްސަލަތަކަކީ އިންތިހާއަށް ކަންބޮޑުވުންހުރި ބޮޑެތި ސީރިއަސް މައްސަލަތައް ކަމަށާއި، ކުރެވުނު މުއާމަލާތްތަކުން ފާހަގަވީ އެއްކަމަކީ ދެފަރާތުން ދައްކާ ވާހަކަ ދިމާނުވާ ކަމާއި އޭގެ ޒިންމާ އުފުލާނީ ކޮން ފަރާތަކުންކަންވެސް އޮޅުންބޮޅުން ގަނޑެއްގެ ތެރޭގައިވާކަން ކަމަށް ނަރުދޫ ކައުންސިލުން ބުންޏެވެ.
''ނަމަވެސް ކައުންސިލުން ދެކޭ ގޮތުގައި ކަންކަން އެގޮތަށް ދިޔުން އެއީ ރައްޔިތުން ޚިދުމަތުން މަހުރޫމުވާންޖެހޭ ސަބަބެއް ނޫނެވެ. ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ށ.އަތޮޅަށް ކުރެއްވި ދަތުރުފުޅުގައި ރައީސުލް ޖުމްހޫރިއްޔާ ދެއްވި ފުރުސަތެއްގައި ށ.މިލަންދޫގައި އޮތް ބައްދަލުކޮށްލުމެއްގައި ވެސް އެމަނިކުފާނަށް މިކަން ވާނީ ދަންނަވާފައެވެ. އަދި ރައީސުލް ޖުމްހޫރިއްޔާގެ އޮފީހަށާއި، މިނިސްޓްރީ އޮފް ކޮންސްޓްރަކްޝަންސް އެންޑް އިންފްރާސްޓްރަކްޗަރ އަށްވެސް ވަނީ މިކަން ބަޔާންކޮށް ސިޓީތައް ފޮނުވިފައެވެ.''
ކައުންސިލުން ބުނީ މަސައްކަތް ހުއްޓާލާފައި އޮތުމުގެ ސަބަބުން، މަސައްކަތްކުރުމަށް ގެނެސްފައިވާ ތަކެތި ބޭނުން ނުކުރެވޭ ވަރަށް ހަލާކުވެ، ވީރާނާވަމުން ދިޔުމަކީ ރައްޔިތުން ނިހާޔަތަށް ކަންބޮޑުވާ ކަމެއް ކަމަށާއި، އަދި އެއީ އިސްރާފުވަމުންދާ މުދާތަކެއް ކަމަށެވެ. ތަކެތި ބެހެއްޓުމަށް ބަނދަރު ސަރަހައްދުން ހިލޭ ދޫކޮށްފައިވާ ބިމުގައި ހަދާފައިވާ ގުދަން ހަލާކުވެ އެ ތަނުގައި ގުދަން ކޮށްފައިވާ އަގުބޮޑު މުދާތަކާއި، ރަށުގެ އެކި ހިސާބު ތަކުގައި ބަހައްޓާފައިހުރި މަސައްކަތަށް ބޭނުންކުރާ ސާމާނު ހަލާކުވެ އެ ތަކެތީގެ ސަބަބުން އެ ތަންތަނުން ވަރަށް ބޮޑަށް އާންމު ފަރާތްތަކަށް ދަތިތަކާއި ކުރިމަތިވަމުން އައުމަކީ ކޮންމެހެން ސަމާލުކަން ދެއްވައިގެން ހައްލު ކުރުމަށް ކައުންސިލާއެކު މުއާމަލާތްކޮށް ހައްލުވާންޖެހޭނެ ކަންކަމުގައި ވެސް ބަޔާނުގައި ފާހަގަކޮށްފައިވެއެވެ.
މަގުތަކުގައި ވަޅުލާފައިވާ އައި.ސީތަކުގައި މަދިރިފަނި އަޅައި، ކުނިބުނި އަޅައި އެކަމުގެ ސަބަބުން ސިއްހީ މައްސަލަތަކާއި ކުރިމަތިވާ ހާލަތަށް ދިޔުމާއި، މަގު ބޭނުން ކުރާ، ޚާއްސަކޮށް ބަލި މީހުންނާއި، ދުވަސްވީ މީހުންނާއި، ކުޑަކުދިންނާއި އަންހެނުންނާއި، އެއްގަމު އުޅަނދު ދުއްވާ ފަރާތްތަކަށް އެތަކެއް ދަތި ތަކާއި ގެއްލުން މެދުވެރިވަމުންދާކަން ވެސް ބަޔާނުގައި ފާހަގަކޮށްފައިވެއެވެ.
''މިކަންކަމުގެ މައުލޫމާތު ރަނގަޅަށް އެނގޭހިނދު، އެއްވެސް ސަމާލުކަމެއް ނުދެއްވާ، ހަނު ތިއްބެވުން އަޅުގަނޑުމެން އިންތިހާއަށް ކުށްވެރިކޮށް ބަލައިނުގަންނަމެވެ. އަދި މިފަދަ ހާލަތަކަށް ދާންޖެހޭ ސަބަބެއް އަދި މެދުވެރިވާން ޖެހޭކަމަށް ގަބޫލު ނުކުރަމެވެ.''
މީގެއިތުރުން ކައުންސިލުން ބުނީ މަސައްކަތްކުރުމަށް މި ރަށުން ނަގާފައިވާ ބައެއް ފަރާތްތަކަށް ދޭންޖެހޭ އުޖޫރަ ނުދިނުމާއި، ބައެއް ބިދޭސީ މުވައްޒަފުންނަށް ބޭނުންވާ ޒަރޫރީ ކަންކަން ނުވެދިޔުމުން އެފަދަ މައްސަލަތަކަށް ކައުންސިލުން ތަކުރާރުކޮށް ވަންނަން ޖެހުމާއި، މަސްތުވާތަކެއްޗަށް ތުހުމަތު ކުރެވޭ މީހުންނާއި، ސެލެބްރިޓީންގެ ލައިފްސްޓައިލް ގެންގުޅޭ ބައެއް ސިފަތައް ހުންނަ ބައެއް ފަރާތްތައް އެއްވެސް ބޭނުމެއްނެތި މަސައްކަތަށް ކަމަށް ބުނެ ރަށަށް ގެނެސް، އެފަދަ މީހުންގެ ފަރާތުން އާންމުންގެ ޝަކުވާތައް ލިބި، މާރާމާރީއަށް މަގުފަހިވާފަދަ އަމަލުތައް ހިނގާފައިވާ ކަމަށެވެ. އަދި މަޝްރޫއުއަށް ބޭނުންވާ ފުރިހަމަ އެއްބާރުލުމާއި އެހީތެރިކަމާއި ސަޕޯޓް ކައުންސިލުން އަބަދުވެސް ދެމުންދާއިރު، މި ކަންކަމަށް އެއްވެސް ސަމާލުކަމެއް ނުދެއްވައި، ވާނެ ގޮތަކަށް ވާން ދޫކޮށްލާފައި ތިއްބެވުމަކީ ކައުންސިލާއި ރައްޔިތުން އިންތިހާއަށް ކަންބޮޑުވާ އަދި ސަރުކާރާމެދު އޮތް ލޯތްބާއި އިތުބާރު ކުޑަވެގެންދާނެ ކަމެއް ކަމަށާއި، މި މަގުން ކަންހިނގަމުންދާއިރު އަދި އަމަލީ މަސައްކަތުގެ ބޮޑުބައި ނުނިމިވަނިކޮށް، މަޝްރޫއުއަށް ކަނޑައެޅި ބަޖެޓް ހުސްވެ މަސައްކަތް ހަވާލުވީ ފަރާތުން އެ ޝަކުވާ ކުރެއްވުމަކީ އަޑުއަހަން ދަތި ވާހަކަތަކެއް ކަމަށެވެ.
ކައުންސިލުން ބުނީ މި މަޝްރޫއުގެ ސަބަބުން ކުރިމަތިވަމުންދާ މައްސަލަތަކަށް އެކަށީގެންވާ ހައްލެއް ހޯދުމަށް ކައުންސިލުން ކެނޑިނޭޅި ކުރަމުންދާ މަސައްކަތްތަކާއި މުއާމަލާތްތަކަށް، މިކަމާ ގުޅުންހުރި ފަރާތްތަކުން ބީރު ކަންފަތެއް ދިނުމަކީ ބަލައިނުގަނެވޭނެ ކަމެއް ކަމަށެވެ.
މި ކަންކަން ފާހަގަކޮށް ކައުންސިލުން ވަނީ ނަރުދޫގެ ހުއްޓިފައިވާ ނަރުދަމާ ނިޒާމާބެހޭ މަޝްރޫއުގެ އަމަލީ މަސައްކަތަށް ޚާއްސަ އިސްކަމެއްދެއްވައި، އެކަން ހައްލުކޮށް ދެއްވުމަށް ސަރުކާރުގެ ކަމާއިބެހޭ މުއައްސަސާތަކަށް ވަރަށް އަދޭހާއެކު ގޮވާލައިފައެވެ.
މި ލިޔުން ކިޔާލުމުން
