ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ސަރުކާރުން މި އަންނަ ރަމަޟާން މަހު ކޮންމެ ގޭބިސީއަކަށް 48 ދަޅުގެ މަސްކޭހެއް ދޭނެ ކަމުގައި މޯލްޑިވްސް އިންޑަސްޓްރިއަލް ފިޝިންގ ކޮމްޕެނީ (މިފްކޯ) އިން ބުނެފިއެވެ.
މިފްކޯ އިން ބުނީ ރައީސް ޑރ. މުޢިއްޒުގެ މި ވަޢުދު ފުއްދުމަށްޓަކައި އެ ކުންފުނިން މިހާރުން ފެށިގެން ތައްޔާރުވަމުންދާ ކަމަށެވެ.
މިގޮތުން މިފްކޯއިން އާންމު ގޮތެއްގައި ކޮންމެ އަހަރެއްގެވެސް ރަމަޟާން މަހަށް ގާތްގަނޑަކަށް 100،000 މަސްދަޅު އުފައްދާއިރު، ރައީސްގެ ވަޢުދުފުޅާ އެއްގޮތަށް ކޮންމެ ގޭބިސީއަކަށް މަސްދަޅު ކޭހެއް ފޯރުކޮށްދިނުމަށްޓަކައި އެ ކުންފުނީގެ އުފެއްދުން ވަނީ އިތުރުކުރެވިފައެވެ. މިގޮތުން ރަމަޟާން މަހަށް އުފައްދާ މަސްދަޅު ކޭސްތައް އަންނަ މަހުގެ ނިޔަލަށް ތައްޔާރުވާނެ ކަމަށް ބެލެވޭއިރު، އެއަށްފަހު މަސްދަޅު ކޭސްތައް ބެހުމުގެ މަސައްކަތް ފެށޭނެއެވެ. މަސްދަޅު ކޭސްތައް ބަހާނެ ގޮތް މިހާރު ދަނީ ރާވަމުންނެވެ.
ސަރުކާރަށް އެއް އަހަރު ފުރުމުގެ މުނާސަބަތުގައި 17 ނޮވެންބަރު 2024 ގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ރޯދަމަހު ދިވެހި ކޮންމެ ގޭބިސީއަކަށް މަސްދަޅު ކޭހެއް ސަރުކާރުން ހިލޭ ދޭނެ ކަމަށް ވިދާޅުވެފައެވެ.
އެ ޖަލްސާގައި ރައީސް ވިދާޅުވީ، ސަރުކާރުން ވަނީ މިދިޔަ ރޯދަމަހު ކަރަންޓް ބިލުން ޑިކްސްކައުންޓް ދީފައި ކަމަށެވެ. އެގޮތުން ކަރަންޓް ބިލުން މިދިޔަ ރޯދަމަހު 142 މިލިއަން ރުފިޔާގެ ޑިސްކައުންޓް ދީފައިވާކަަމަށެވެ. މީގެއިތުރުން މިދިޔަ ރޯދަމަހު 82،000 ގޭބިސީއަކަށް 1.6 މިލިއަން ކިލޯގެ ކާޑު ދޫކޮށްފައިވާކަމަށް ވެސް ރައީސް ވިދާޅުވިއެވެ.
އަދި މިދިޔަ ރޯދަ މަހުގައި ރާއްޖޭގެ ރައްޔިތުންނަށް ރޯދަ ހަދިޔާގެ ގޮތުގައި ކާޑުގެ ބާވަތްތައް ދިންކަން ވަނީ ފާހަގަކުރައްވައިފައެވެ. ކުރިއަށް އޮތް ރޯދަ މަހު ކާޑުގެ ބަދަލުގައި ކޮންމެ ގެއަކަށް ހިލޭ މަސް ކޭހެއް ދިނުމަށް އެސްޓީއޯއަށް އަންގަވާފައިވާނެ ކަމަށްވެސް ރައީސް ވިދާޅުވިއެވެ.
މި ލިޔުން ކިޔާލުމުން
