ވިއްސާރަވެ ފެންބޮޑުވުމާ ގުޅިގެން ބައެއް ކަންކަމަށް ސަމާލުކަންދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
މިހާރު ކުރަމުންދާ ވިއްސާރައިގައި މުޅި މާލޭގައި ފެންބޮޑުވުމުގެ ސަބަބުން ފެން ހިންދުމަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން، މާލޭގެ 8 ސަރަހައްދެއްގައި 23 ޕަންޕު ބަހައްޓައިގެން ދަނީ މަސައްކަތްކުރަމުންނެވެ. މި މަސައްކަތުގައި މިހާތަނަށް ވަނީ 13882 ޓަނުގެ ފެން ހިންދާފައެވެ.
ފެންބޮޑުވުމުގެ ސަބަބުން ބައެއް ގެތަކުގެ ފާޚާނާތަކުން ނަޖިސް ލީކުވުމާއި ކައްކާ ކައިބޮއެ ހެދުމަށް ބުރޫ އަރާ އާންމު ދިރިއުޅުމަށް ވެސް ވަނީ ހުރަސްއެޅިފައެވެ.
މާލޭގެ ހާލަތު މިހާ ހިސާބަށް ގޮސްފައިވާއިރު، އެޗްޕީއޭއިން މިއަދު ވަނީ ފެންބޮޑުވުމާ ގުޅިގެން ބައެއް ކަންކަމަށް ސަމާލުކަންދިނުމަށް އިލްތިމާސްކޮށްފައެވެ.
ސަމާލުކަންދޭންވީ ކަންކަމުގެ ތެރޭގައި ފެންހިންދާ ސާފުކޮށް ނިމެންދެން ފެނުގެ އަސަރުކޮށްފައިވާ ހިސާބަށް ކުޑަކުދިން ގާތްވިޔަ ނުދިނުމާއި، ނަރުދަމާ ޖަންކްޝަން ނުވަތަ ސެޕްޓިކް ޓޭންކް ފުރިގެން ބޭރުވެފައިވާނަމަ ސާފުކުރުމުގެ ކުރިން ޕަބްލިކް ހެލްތުގެ ޔުނިޓުގެ އެހީތެރިކަން ހޯދުން ހިމެނެއެވެ.
މީގެއިތުރުން ހަމުގައި ފާރުގަނޑެއް ހުރިނަމަ ފެންގަނޑުގައި ޖެހުނަ ނުދިނުމަށް ފެން ހިންދުމުގައްޔާއި ސާފުކުރުމުގައި ހަރަކާތްތެރިވާން ޖެހިއްޖެނަމަ، ފެން ނުވަންނާނެހެން މަލަން އަޅާ ފާރުގަނޑު ފޮރުވައިލުމާއި، ފެންހިންދުމުގައްޔާއި ފެން ހިންދުމަށްފަހު ސާފުކުރުމުގައި ހަރަކާތްތެެރިވިއިރު ރައްކާތެެރިވުމަށް އަންގިއާއި މާސްކް ފަދަ ތަކެތި ބޭނުންކުރައްވާ އަދި މަސައްކަތް ނިމުމުން މިތަކެތި ކޮތަޅެއްގައި ބަންދުކުރުމަށްފަހު ރައްކާތެރިކަމާއެކު އުކައިލުން ހިމެނެއެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ހާމަކޮށްފައިވާ ގޮތުން، 11 ޖަނަވަރީގައި މާލެއަށް ކުރި ވިއްސާރާގައި ފެންބޮޑުވުމުގެ ސަބަބުން 7 ގޭބިސީއެއްގެ 44 މީހަކަށް 1 ދުވަހަށް ވަގުތީ ބޯހިޔާވަހިކަމާއި ކެއިން ބުއިންމުގެ އިންތިޒާމު އެ އޮތޯރިޓީން ވަނީ ހަމަޖައްސައިދީފައެވެ.
އެ ގޭބީސީތަކުގެ މީހުންނަށް ވަގުތީ ބޯހިޔާވަހިކަން ހަމަޖައްސައިދިނީ ފެންބޮޑުވުމުގެ ސަބަބުން ބައެއް ގެތަކުގެ ފާޚާނާތަކުން ނަޖިސް ލީކުވުމާއި، ކައްކާ ކައިބޮއެ ހެދުމަށް ބުރޫ އަރާ އާންމު ދިރިއުޅުމަށް ވެސް ހުރަސްއެޅުމުގެ ސަބަބުންނެވެ.
އެމްއެންޑީއެފްއިން ބުނެފައިވާ ގޮތުގައި އެމްއެންޑީއެފް މާލޭ އޭރިއާ ކޮމާންޑުން ކުރިއަށްގެންދާ އޮޕަރޭޝަންގައި މިހާތަނަށް 104 ގެއަކަށް އެހީތެރިކަން ފޯރުކޮށްދީ، 528 ވެލި ބަސްތާ ވަނީ ޖަހައިދީފައެވެ.
މި ލިޔުން ކިޔާލުމުން
