ޕީޓީއޭގެ އެހީތެރިކަމާއެކު މަޖީދިއްޔާ ސްކޫލުގެ 26 ކްލާސްރޫމްގައި އޭސީ ހަރުކޮށްފިއެވެ.
މަޖީދިއްޔާ ސްކޫލުން ސޯޝަލް މިޑިއާގައި ކޮށްފައިވާ ޕޯސްޓެއްގައި ބުނީ ސްކޫލުގެ ދަރިވަރުން ބޭނުންކުރާ 26 ކުލާސްރޫމެއްގައި އޭސީ ހަރުކޮށް ނިންމާ ބޭނުންކުރަން ފަށާފައިވާ ކަމަށެވެ.
" ކޫލް ސްކޫލް ޕްރޮޖެކްޓް " އަކީ ކާމިޔާބު މަސައްކަތެއްކަން ފާހަގަކުރައްވާ އެ ސްކޫލުން ބުނީ މިއީ ބެލެނިވެރިންގެ އިސްނެންގެވުމާއި، ބައިވެރިވުމާއެކު ކުރި މިންނެތް މަސައްކަތުގެ ނަތީޖާކަމަށެވެ.
"މި މަސައްކަތުގެ ޙައްޤު ޝުކުރު ސްކޫލުގެ ހުރިހާ ބެލެނިވެރިންނަށާއި، ޚާއްޞަކޮށް ސްކޫލުގެ ޕީ.ޓީ.އޭ އަށް ދަންނަވަން. މި މަސައްކަތުގައި ބެލެނިވެރިންގެ އިތުރުން ސްކޫލުގެ ހުރިހާ މުވައްޒަފުންގެ ބައިވެރިވުން ޝުކުރުވެރިކަމާއެކު ފާހަގަކުރަން" ސްކޫލުން ބުނެފައެވެއެވެ
ކޫލް ސްކޫލް ތަޞައްވަރެއް ގެންގުޅުއްވައި އެކަން ފައްޓަވައި ސްކޫލްތަކަށް އެކަމަށް މަގުފަހިކޮށްދެއްވާފައި ވާތީ، އެޑިޔުކޭޝަން މިނިސްޓަރ އިސްމާޢީލް ޝަފީޢުއަށާއި މިނިސްޓަރގެ ޓީމަށް ވެސް ސްކޫލުން ވަނީ ޝުކުރުއަދާކުރައްވަފައެވެ.
މަޖީދިއްޔާ ސްކޫލް ވާނީ ސާނަވީއަށް ކިޔަވައިދޭ ސްކޫލްތަކުގެ ތެރެއިން، މާލޭގެ ސަރައްހައްދުގައި "ކޫލް ސްކޫލް" އަކަށް ބަދަލުވި ފުރަތަމަ ސްކޫލަށެވެ.
މިދިޔަ ޖޫން މަހުގެ ދެ ވަނަ ދުވަހު ސަރުކާރުން އިއުލާން ކުރި ކޫލް ސްކޫލް ޕްރޮޖެކްޓާއެކު ބައެއް ސްކޫލްތަކުގައި އަންނަނީ ދީލަތި ފަރާތްތަކުގެ އެހީތެރިކަމާއެކު އޭސީ ހަރުކުރަމުންނެވެ. އެކަމުގައި އެންމެ ބޮޑު އެހީތެރިކަމެއް ފޮރުކޮށް ދެނީ ރަށްރަށުގެ ކައުންސިލްތަކުންނެވެ.
މި ލިޔުން ކިޔާލުމުން
