ފުވައްމުލައް ސިޓީގައި މަސްތުވާތަކެތީގެ ވިޔަފާރިއާ ދެކޮޅަށް ދިވެހި ފުލުހުންގެ ޚިދުމަތުން ކުރިއަށްގެންދާ "އޮޕަރޭޝަން ވެށި ރައްކަލް" ގެ ދަށުން، މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގައި އިސްކޮށް ހަރަކާތްތެރިވާކަމަށް ތުހުމަތުކުރެވިގެން ހައްޔަރުކުރި ދެ މީހުން ބަންދުން ދޫކޮށްލަން ހައި ކޯޓުން އަމުރުކޮށްފިއެވެ.
ފުލުހުންގެ އިންޓެލޖިންސް އަދި ތަޙުޤީޤަށް ލިބުނު މަޢުލޫމާތަކާ ގުޅިގެން 2024 ޑިސެންބަރު 9 ވަނަ ދުވަހު ހައްޔަރުކޮށްފައިވަނީ . ޏ. ފުވައްމުލައް / ދޫޑިގަން، ކަރަންކާވިލާ، އަޙްމަދު ނިއުޝާދު (34 އަހަރު) އާއި ޏ. ފުވައްމުލައް / ދޫޑިގަން، ޒަމާނީގެ، ޙަސަން ޢާޒިމް (29 އަހަރު) އެވެ.
މި މައްސަލައާ ގުޅިގެން ފުލުހުން ކުރިން ހާމަކުރި ގޮތުގައި، ފާއިތުވި 5 އަހަރު ތެރޭގައި އަޙްމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވެއެވެ. އަދި ފާއިތުވި 2 އަހަރު ތެރޭގައި ޙަސަން ޢާޒިމްގެ ބޭންކު އެކައުންޓް މެދުވެރިކޮށް 7 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާކަން ވަނީ ފާހަގަކުރެވިފައެވެ.
މި މައްސަލައާ ގުޅިގެން ފުވައްމުލަކު މެޖިސްޓްރޭޓް ކޯޓުން އެމީހުން ޝަރީޢަތް ނިމެންދެން ބަންދުކުރުމަށް ނިންމި ނިންމުން ހައި ކޯޓުގައި އިސްތިއުނާފު ކުރުމުން، ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށް ކަނޑައަޅައި ހައި ކޯޓުން ވަނީ އެމީހުން ބަންދުން ދޫކޮށްލުމަށް އަމުރުކޮށްފައެވެ.
ހައިކޯޓުން ކުރި ހުކުމްގައި ބުނެފައިވަނީ ބުނީ އެ ދެމީހުން ޝަރީއަތް ނިމެންދެން ބަންދުކުރުމުގައި ފަނޑިޔާރު ރިއާޔަތްކޮށްފައިވަނީ، ކުށުގެ ތުހުމަތުގައި ބަންދުކޮށްފައިވާ މީހަކު ބަންދުކޮށްފައި ވަނީ ޤާނޫނާ އެއްގޮތަށްތޯ ނުވަތަ ނޫންތޯ ކަނޑައަޅައި އެމީހަކު އިތުރަށް ބަންދުގައި ބެހެއްޓުމާމެދު ގޮތް ކަނޑައަޅާ މާއްދާ އަށް ކަމަށާއި، ނަމަވެސް ފަނޑިޔާރު ބަލަން ޖެހޭނީ ތުހުމަތުކުރެވުނު ކުށް އޭނާ ކުރިކަމަށް ބާރު ލިބިދޭ ހެކި ހުރިތޯ ކަމަށާއި ހެކި ހުރި ނަމަ، ހެކީގެ ނިސްބަތް ބަލާ ދެ ހާލަތެއް އެ މާއްދާގައި ބަޔާންކުރާ ކަމަށެވެ. އެއީ ތުހުމަތު ކުރެވޭ މިންވަރަށް ހެކި ހުރުމާއި ކުށް ކުރިކަމަށް ތުހުމަތުކުރެވޭ މިންވަރަށް އެކަށީގެންވާ ހެކި އެވަގުތު ނެތް ނަމަވެސް ތުހުމަތުކުރެވޭ ކޮންމެވެސް މިންވަރަކަށް ހެކި ހުރުމެވެ.
މިގޮތުން އާޒިމްގެ އަމުރުގައި، އެކަށީގެންވާ ހެކި ހުރިކަމަށް ބުނުމަށް ފަހު އިތުރު ދެ ތަނެއްގައި ތުހުމަތުކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށް ބަޔާންކޮށްފައި އޮތުމާއި، ނިއުޝާދުގެ އަމުރުގައި ތުހުމަތުކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށް ބުނެ ފަނޑިޔާރު ރިއާޔަތްކޮށްފައި ވަނީ ތުހުމަތުކުރެވޭ މިންވަރަށް ހެކި ހުރި ކަމަށް ގޮތުގައި ހައިކޯޓުގެ އަމުރުގައި ވެއެވެ.
ހައި ކޯޓުން ބުނެފައިވާ ގޮތުގައި ދައުލަތުން ވެސް އެއްބަސްވާ ގޮތުގައި ތުހުމަތުކުރެވޭ ކޮންމެވެސް މިންވަރެއްގެ ހެކި ހުރިކަމަށް ބަޔާންކުރުމަށް ފަހު، އެ ފަރާތްތައް ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާއާ ހިލާފު ނިންމުމެކެވެ.
އިސްތިއުނާފާ ގުޅިގެން ދައުލަތުން ވަކާލާތުކޮށްފައި ވަނީ، ދަށު ކޯޓަށް ހެދިފައި އޮތް ގޯހަކީ ބަންދު އަމުރަށް ބުރޫ ނާރާނެ އިޖުރާއީ އައިބެއްގެ ގޮތުގައި ކަނޑައަޅައިދިނުމަށެވެ. ނަމަވެސް ހައި ކޯޓުން ވަނީ އެކަން އެގޮތަށް ކަނޑައަޅައިދެވޭނެ ޤާނޫނީ ހަމައެއް ދައުލަތަށް ދެއްކިފައި ނުވާ ކަމަށާއި އެއީ ދަށު ކޯޓަށް ހެދިފައި އޮތް ގޯހުގެ ސަބަބުން ކަމަށް ކަނޑައަޅައިފައެވެ.
މި ލިޔުން ކިޔާލުމުން
