މާލޭގެ މަގުތަކުން ފެން ހިނދި އާންމު ހާލަތަށް އަންނަންދެން ބަރު އުޅަނދު ނުދުއްވުމަށް ދިވެހި ފުލުހުންގެ ޚިދުމަތުން އަންގައިފިއެވެ.
މިގޮތުން ފުލުހުން ވަނީ ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުން ދާތީ، މަގުތަކުން ފެން ހިނދި އާންމު ހާލަތަށް މަގުތައް އަންނަންދެން، ބަރު އުޅަނދު މާލޭގެ މަގުތަކުގައި ނުދުއްވުމަށާއި ހަތަރު ފުރޮޅުލީ އުޅަނދު ޒަރޫރީ ބޭނުންތަކުގައި މެނުވީ ނުދުއްވުމަށް އަންގައިފައެވެ. މީގެ އިތުރުން، މިފަދަ ހާލަތްތަކުގައި ރައްޔިތުންގެ ފަރާތުން ލިބެމުންދާ އެއްބާރުލުމާއި އެހީތެރިކަމަށް ޝުކުރު ދަންނަވާ ކަމަށްވެސް ފުލުހުން ބުނެފައިވެއެވެ.
މިހާރު ކުރަމުންދާ ވިއްސާރައިގައި މާލޭގެ ގޭގެއަށާއި ފިހާރަ ތަކަށް ފެން ވަނުން ރައްކާތެރިކުރުމަށް ވެލިބަސްތާ ޖެހުމާއި ފެން ވަދެފައިވާ ގޭބިސީތަކުން ފެން ހިންދުމުގައި ފުލުހުން ދަނީ ހަރަކާތްތެރިވަމުންނެވެ. މިފަދަ އެހީތެރިކަމެއް ބޭނުންވާނަމަ 911 އަށް ގުޅުމަށް ފުލުހުން ވަނީ އެދިފައެވެ.
މީގެއިތުރުން، މާލޭގެ މަގުތަކުގައި ފެން ބޮޑުވެގެން، ފެން ހިންދުމަަށް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ވެސް ދަނީ މާލޭގެ 03 ސަރަހައްދެއްގައި 11 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުންނެވެ.
މޫސުން ގޯސްވާނެ ކަމަށް ލަފާކޮށް މޫސުމާބެހޭ ޤައުމީ އިދާރާ (މެޓް އޮފީސް) އިން ނެރުނު އޮރެންޖު ސަމާލުގެ ވަގުތުވެސް ވަނީ އިތުރުކޮށްފައެވެ.
އެގޮތުން މެޓް އޮފީހުން ވަނީ ބ. އަތޮޅުން ފެށިގެން ތ. އަތޮޅާ ދެމެދުގެ ރަށްތަކަށް މިއަދު 19:00 އިން 23:00 އަށް އޮރެންޖު ސަމާލު ނެރެފައެވެ. އެ އިދާރާއިން ލަފާކުރާ ގޮތުގައި މި ވަގުތުތަކުގައި މި ސަރަހައްދުތަކަށް ގުގުރުމާއެކު ބޯކޮށް ވާރޭވެހި، ފެންބޮޑުވާނެއެވެ.
މި ލިޔުން ކިޔާލުމުން
