ގދ. ތިނަދޫއަށް ދީފައި އޮތް ސިޓީގެ ދަރަޖަ ބާތިލުކުރަން ހައިކޯޓަށް ހުށަހެޅި ދުސްތޫރީ މައްސަލަ ބަލައިނުގަނެ، އެ މައްސަލަ ކޯޓުން ބޭރުކޮށްލައިފިއެވެ.
މި މައްސަލަ ހައިކޯޓަށް ހުށަހެޅުއްވީ އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު އަދި މަޝްހޫރު ގާނޫނީ ވަކީލު މުޙައްމަދު ރާޤިބެވެ.
ރައީސުލްޖުމްހޫރިއްޔާގެ އޮފީހަށް ރައްދުކޮށް ހުށަހަޅުއްވާފައިވާ މި މައްސަލާގައި ބުނެފައިވަނީ ކުރީ ސަރުކާރުގައި ރައީސުލްޖުމްހޫރިއްޔާގެ ގަރާރަކުން ތިނަދުއަށް ސިޓީއެއްގެ ދަރަޖަ ދީފައިވަނީ އެ ރަށު ކައުންސިލުން ދީފައިވާ ދޮގު މައުލޫމާތުތަކެއްގެ މައްޗަށް ބިނާކޮށް ކަމަށެވެ. އެގޮތުން ތިނަދޫ ކައުންސިލު އިދާރާއިން އެ ރަށުގެ އާބާދީގެ ރަސްމީ އަދަދު ހިއްސާކޮށްފައިވަނީ އޮޅުވާލައިގެން ކަމަށާއި، ރަށުގެ އާބާދީއަކީ 10,150 މީހުން ކަމަށް ބުނެފައިވާއިރު، އެކެއްގެ ނަމުގައި އެއް އައިޑީ ކާޑު ނަންބަރަށްވުރެ ގިނަ ނަންބަރު ބޭނުންކޮށްފައިވާ ކަމަށެވެ. އަދި އެކެއްގެ ނަން އެއްފަހަރަށްވުރެ ގިނަ ފަހަރު އެ ލިސްޓުގައިވާ ކަމަށާއި، އޭރު މަރުވެފައިވާ 115 މީހުންގެ ނަން ވެސް ލިސްޓުގައި ހިމަނާފައިވާ ކަމަށެވެ. މީގެއިތުރުން ވެސް ލިސްޓުގައި އޮޅުންއަރާފަދަ އެތައް ކަމެއް ހުރިކަމަށް ރާޤިބު ހުށަހެޅުއްވި މައްސަލާގައި ބުނެފައިވެއެވެ.
އެހެންކަމުން ތިނަދޫއަށް ސިޓީއެއްގެ ދަރަޖަ ދީފައިވަނީ ގާނޫނާ ޚިލާފަށް ކަމަށް ކަނޑައެޅުމަށާއި، އެ ރަށަށް ސިޓީއެއްގެ ދަރަޖަ ދިނުމަށް ނިންމަވައި ރައީސުލްޖުމްހޫރިއްޔާ ނެރުއްވި ގަރާރު ބާތިލުކޮށްދިނުމަށް ރާޤިބުގެ މައްސަލާގައި އެދިވަޑައިގެންފައިވެއެވެ.
އެ މައްސަލައާ ގުޅިގެން ހައި ކޯޓުގެ ރަޖިސްޓްރާގެ ނިންމެވުމުގައި ވަނީ ދުސްތޫރީ މައްސަލަތަކުގެ ތެރެއިން ހައި ކޯޓަށް ބެލުމުގެ އިހުތިސާސް ލިބިފައިވަނީ ގާނޫނެއް ނުވަތަ ގާނޫނެއްގެ ބައެއް ގާނޫނުއަސާސީއާ ތައާރަޒުވާ ކަމަށް ބަޔާންކޮށް ހުށަހަޅާ މައްސަލަތައް ކަމަށާއި، ރައީސުލުޖުމްހޫރިއްޔާގެ ޤަރާރަކީ ގާނޫނެއްގެ ދަރަޖަ ދެވޭނެ އެއްޗެއް ނޫން ކަމަށާއި އެއީ ރައްޔިތުންގެ މަޖިލީހުން ފާސްކޮށްފައިވާ މަސްދަރެއް ވެސް ނޫން ކަމަށެވެ.
މީގެ އިތުރުން، ޤަރާރާ ގުޅޭ ހުށަހެޅުންތަކަކީ ދުސްތޫރީ ގޮތުން ހައި ކޯޓަށް ބެލޭނެ ފަދަ މައްސަލައެއް ނޫން ކަމަށް ސުޕްރީމް ކޯޓުން ވެސް ކަނޑައަޅާފައިވާ ކަމަށާއި، އެހެންކަމުން، ތިނަދޫ އަށް ސިޓީއެއްގެ ދަރަޖަ ދިން ރައީސުލްޖުމްހޫރިއްޔާގެ ޤަރާރާ ގުޅޭ މައްސަލަ އެ ކޯޓަށް ނުބެލޭނެ ކަމަށް ވަނީ ކަނޑައަޅައިފައެވެ.
ތިނަދޫއަށް ސިޓީއެއްގެ ދަރަޖަ ދިނީ މިދިޔަ އަހަރުގެ އޮގަސްޓްމަހުގެ 30 ވަނަ ދުވަހު އޭރުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.
މި ލިޔުން ކިޔާލުމުން
