މީގެ 20 އަހަރު ކުރިން 2004 ވަނަ އަހަރުގެ ޑިސެމްބަރު 26 ގައި ރާއްޖެއަށް ކުރިމަތިވި ސުނާމީ ކާރިސާގައި، ސިފައިން ވި ގުރުބާނީން ދައްކުވައިދީފައި ވަނީ ރައްޔިތުންގެ ޚިދުމަތުގައި އެއްވެސް ޝަކުވާއެއްނެތި އަބަދުވެސް ދެމިތިބޭނެކަން ކަމުގައި ދިފާއީ ވުޒާރާއިން މިއަދު ބުނެފިއެވެ.
ސުނާމީ ކާރިސާގައި ރާއްޖޭގެ ރައްޔިތުން ސާބިތުކޮށްދިން އަޚުވަންތަކަމާއި، އެއްބައިވަންތަކަމާއި، ޖަމާއަތުގެ ރޫހު ދިރުވައި އާލާކުރުމަށްޓަކައި ކޮންމެ އަހަރެއްގެ ޑިސެމްބަރު 26 ގައި ފާހަގަކުރާ ދިވެހީންގެ އެއްބައިވަންތަކަމުގެ ދުވަހާ ގުޅިގެން ދިފާއީ ވުޒާރާއިން އާންމުކުރި މަޒުމޫނެއްގައި ބުނެފައިވަނީ ސުނާމީ ކާރިސާއަކީ އެ ކާރިސާގެ ސަބަބުން ރައްޔިތުންނަށް ނަފްސާނީ ގޮތުންނާއި، ޖިސްމާނީ ގޮތުންނާއި އަދި އިގުތިސާދީ ގޮތުން ވެސް ފޫނުބެއްދޭވަރުގެ ބޮޑެތި ގެއްލުންތަކެއް ލިބިގެންދިޔަ ކާރިސާއެއް ކަމަށެވެ. އަދި މި ކާރިސާއިން ލިބުނު ގެއްލުންތަކުން އަރައިގަތުމަށްޓަކައި ގައުމީ ފެންވަރުގައި ކުރެވުނު މަސައްކަތްތަކުގައި އެންމެ މުހިންމު ރޯލެއް އަދާކުރި އެއް ބަޔަކީ ދިވެހި ސިފައިން ކަމަށެވެ.
ދިފާއީ ވުޒާރާއިން ބުނީ ސުނާމީ ކާރިސާގައި، މަސައްކަތްކުރި ސިފައިންގެ ގުރުބާނީން ދައްކުވައިދީފައި ވަނީ، ސިފައިންގެ ހިތުގައިވާ ގައުމީ ލޯތްބާއި، ގައުމީ ޖޯޝާއި، ސިފައިންގެ އެއްބައިވަންތަކަމާއި ނުގުޑާފަދަ އަޒުމު ކަމަށެވެ. އަދި ސިފައިންގެ ހިތްތަކުގައި ރައްޔިތުންގެ މައްޗަށް އޮތް ލޯތްބާއި ހަމްދަރުދީ ކަމަށެވެ.
ކަމެއް ދިމާވާ ހިނދު، އަތްވާއި ވާރޭގައި، ރެޔާއި ދުވާލު އެއްވެސް ވަރުބަލިކަމެއް ޝަކުވާއެއްނެތި ރައްޔިތުންގެ ޚިދުމަތުގައި ދެމިތިބޭނެކަމެވެ.
ސުނާމީ ކާރިސާގައި ސިފައިން އަދާކުރި ރޯލުގެ މައްޗަށް ނަޒަރެއް
- ރާއްޖޭގެ އެކި ކަންކޮޅުތަކަށް ސުނާމީ އަރަން ފެށުމާއެކު، ރައްޔިތުންނާއި މުދާ ސަލާމަތް ކުރުމަށް ސިފައިން ހަރަކާތްތެރިވާން ފެށި.
- ސުނާމީގެ ސަބަބުން ގިނަ ރަށްތަކެއްގެ މުވާސަލާތީ ގުޅުންކެނޑިފައި ވުމުން، އުޅަނދުތަކުގައި ރަށްރަށަށް ގޮސް ހާލު ދެނެގަތުމުގެ މަސައްކަތް ވަގުތުން ފެށި.
- ގައުމީ ކާރިސާގެ ހާލަތު ވަޒަންކުރުމާއި އެހީ ވިލަރެސްކުރާ މަރުކަޒު" އިސްކަންދަރު ސްކޫލުގައި ގާއިމުކޮށް މަސައްކަތް ފެށި.
- ހާލުގައި ޖެހުނު މާލެއާއި ކައިރި ރަށްތަކުގެ މީހުން ބޭތިއްބުމަށް މާލޭގެ ހަތަރު ސްކޫލެއްގައި "ރިލީފް ސެންޓަރ" ތަކެއް ގާއިމުކުރި.
- 2004 ޑިސެންބަރު 30 ވަނަ ދުވަހު ނެޝަނަލް ޑިޒާސްޓަރ މެނޭޖްމެންޓް ސެންޓަރ (އެންޑީއެމްސީ) އުފެއްދެވުމުން، އެ ސެންޓަރުގެ ލޮޖިސްޓިކް ޑިޕާރޓްމެންޓުގައި ސިފައިން އިސްދައުރެއް އަދާކުރި.
- އެގޮތުން ދަތުރުފަތުރު ހަމަޖެއްސުމާއި، ރާއްޖެއާއި ރާއްޖެއިން ބޭރުންލިބޭ އެހީ، ކަމާބެހޭ ފަރާތްތަކުން ކަނޑައަޅުއްވާ ތަންތަނަށް ފޮނުވުމާއި، ބާޒާރުން ގަންނަންޖެހޭ ތަކެތި ގަތުމަކީ އެސެންޓަރުގައި ސިފައިން ކުރަމުން ދިޔަ ބައެއް މަސައްކަތްތައް.
- ސުނާމީގެ ސަބަބުން އެންމެބޮޑަށް ގެއްލުން ލިބުނު ރަށްތައް ސާފުކުރުމަށް، 2004 ޑިސެންބަރު 31 ވަނަ ދުވަހު ސިފައިންގެ ޓީމުތައް ފުރި.
- ސުނާމީގެ ސަބަބުން ހާލުގައި ޖެހިފައިވާ ރައްޔިތުންނަށް ހަމަހަމަކަމާ އެކު އެހީތެރިކަން ފޯރުކޮށްދީ، ރައްޔިތުންގެ ވިއްސިވިހާލިވެފައިވާ ދިރިއުޅުން އާންމު ހާލަތަކަށް ގެނެސްދިނުމަށްޓަކައި 2005 ޖަނަވަރީ 5 ވަނަ ދުވަހު، ރާއްޖެ 7 ސަރަހައްދަކަށް ބަހާލައި، 7 އަތޮޅެއްގައި "ފޯވާރޑް ކޯޑިނޭޝަން ސެންޓަރ" (އެފްސީސީ) ސިފައިން ގާއިމުކުރި.
- އެގޮތުން ބޯހިޔާވަހިކަން ގެއްލިފައިވާ ފަރާތްތަކަށް ވީހާވެސް އަވަހަކަށް ބޯހިޔާވަހިކަން ހޯދައިދިނުމުގެ ގޮތުން، ޓެންޓް ޖަހައި ވަގުތީ ބޯހިޔާވަހިކަން ފޯރުކޮށްދިން.
- 2005 ޖަނަވަރީ 6 ވަނަ ދުވަހު، އާރާސްތު ކުރުމާ ބެހޭ ސިފައިންގެ ޓީމުތަކެއް ރާއްޖޭގެ 13 ރަށެއްގައި ހަރަކާތްތެރިވާން ފެށި.
- މި ޓީމުތަކުން ހާލުގައި ޖެހިފައިވާ ފަރާތްތަކަށް ދާއިމީ ހިޔާވަހިކަމެއް ލިބެންދެން، ދިރިއުޅެވޭނެ 600 އަށްވުރެ ގިނަ ވަގުތީ ހިޔާ، 30 އަށްވުރެ ގިނަ ރަށުގައި އަޅައިދިން. އަދި ރަށްރަށުގެ މިސްކިތްތަކާއި، ސްކޫލްތަކާއި، ސިއްހީ ފަރުވާދޭ ތަންތަންތަނާއި އަދިވެސް އެހެނިހެން މުހިންމު ތަންތަން އިމާރާތް ކޮށްދިން.
މީގެއިތުރުން ބޭރުގެ ގައުމުތަކުންނާއި، އެކި ޖަމާއަތްތަކުން އެހީގެ ގޮތުގައި ރާއްޖެއަށް ފޮނުވާ ސާމާނު، ހުޅުލެއަށް ބާލައި، ގުދަންކޮށް، ފޯރުކޮށްދޭންޖެހޭ ފަރާތްތަކަށް ފޯރުކޮށްދިނުމަށް ސިފައިން ވަނީ މަސައްކަތްކޮށްފައެވެ. އެގޮތުން ރަށްރަށަށް ފޮނުވުމަށް ޓަކައި މި ތަކެތި ބަރުކުރުމާއި، އެ ރަށްރަށަށް މުދާ ދިއުމުން މުދާބާލައި، ރައްޔިތުންނަށް ފޯރުކޮށްދެވެންދެން އެ މުދާ ބަލަހައްޓައި، ފޯރުކޮށްދިނެވެ.
މި އޮޕަރޭޝަންގެ ތެރެއިން ގެދޮރާއި އަސާސީ ތަކެއްޗަށް ގެއްލުން ލިބުނު ފަރާތްތަކަށް ސަރުކާރުން ދިނުމަށް ނިންމެވި، ފައިސާގެ އެހީ ފޯރުކޮށްދިނުމުގެ ޒިންމާ ވެސް ސިފައިން އަދާކުރިއެވެ. އެގޮތުން ރަށްރަށަށް ދަތުރުކޮށް ލިބިފައިވާ ގެއްލުންތައް ބަލައި، ފައިސާ ދިނުމަށް ކަނޑައެޅިފައިވާ ގިންތިތަކުގެ ތެރެއިން، އެ ތަނެއް ފެތޭ ގިންތިއަކަށް ކަނޑައެޅިފައިވާ މިންވަރަކަށް ފައިސާ ހަވާލުކުރަމުންދިޔައެވެ.
މި ލިޔުން ކިޔާލުމުން
