އަންނަ އަހަރުގެ ފެބްރުއަރީ 8 ވަނަ ދުވަހު ބޭއްވުމަށް އިލެކްޝަން ކޮމިޝަން (އީސީ) އިން ހުޅުވައިލައިފައިވާ ބައި-އިލެކްޝަންތަކުގައި، އެމްޑީޕީގެ ފަރާތުން ކުރިމަތިލުމަށް ޝައުގުވެރިވާ މެންބަރުން ނަށް ފޯމު ހުށަހެޅުމުގެ ފުރުސަތު މިއަދު ހުޅުވައިލައިފިއެވެ.
އެމްޑީޕީއިން އާންމުކުރި ބަޔާނެއްގައި ބުނީ ފޯމު ހުށަހެޅުމުގެ ފުރުސަތު ހުޅުވައިލައިފައިވަނީ މި މަހުގެ ވާ ހުކުރު ދުވަހުގެ 16:00 ގެ ނިޔަލަށް ކަމަށެވެ.
ކުރިމަތިލުމަށް ހުޅުވައިލެވިފައިވާ މަގާމުތަކާއި، ޝައުގުވެރިކަން ފާޅުކުރުމަށް ހުށަހަޅާ ފޯމު ވަނީ އެމްޑީޕީގެ ވެބްސައިޓުގައި އާންމުކޮށްފައެވެ.
ފެބުރުވަރީ 08 ވާ ހޮނިހިރު ދުވަހު ބާއްވަން ހަމަޖެހިފައިވާ ބައި-އިލެކްޝަންތަކުގެ ތެރޭގައި ހދ.އަތޮޅު ކައުންސިލް ރައީސް، ރ.ފައިނު ކައުންސިލް ރައީސް، ނ.ލަންދޫ ކައުންސިލްގެ އަންހެން މެންބަރު، ހދ.މަކުނުދޫ، ފ.ބިލެތްދޫ ކައުންސިލް މެންބަރު އިންތިޚާބު ކުރުމަށް ބާއްވާ ބައި-އިލެކްޝަން ހިމެނެއެވެ.
މީގެއިތުރުން 28 ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަން ބާއްވާ ގޮތަށް ވަނީ ހަމަޖެހިފައެވެ.
އެ ރަށްތަކަކީ ހދ.ނައިވާދޫ، ހދ.ހިރިމަރަދޫ، ށ.ގޮއިދޫ ، ށ.ނޫމަރާ ، ށ.ނަރުދޫ ، ނ.މިލަދޫ ، ނ.ފޮއްދޫ، ނ.ކުޑަފަރި، ރ.ހުޅުދުއްފާރު، ރ.އިންނަމާދޫ، ރ.އުނގޫފާރު، ބ.ހިތާދޫ، ބ.ގޮއިދޫ، ބ.ފެހެންދޫ، ބ.ދަރަވަންދޫ، ކ.ހުރާ، އދ.ހަންޏާމީދޫ، ވ.ފެލިދޫ، މ.މުލި، މ.މަޑުއްވަރީ، ފ.ބިލެތްދޫ، ދ.ހުޅުދެލި، ތ.ބުރުނި، ލ.ގަން، ލ.އިސްދޫ، ގއ.ގެމަނަފުށި، ގއ.ކަނޑުހުޅުދޫ، އަދި ގދ.ރަތަފަންދުއެވެ.
ބިލެތްދޫ، ފެލިދޫ، ދަރަވަންދޫ އަދި އިންނަމާދޫ މިއިން ކޮންމެ ރަށެއްގެ އަންހެނުންގެ ކޮމިޓީއަށް އިންތިޚާބުކުރުމަށް ހަމަޖެހިފައިވަނީ ދެ މެންބަރުންނެވެ. ބާކީ 24 ރަށުގެ ތެރެއިން ކޮންމެ ރަށެއްގެ އަންހެނުންގެ ކޮމިޓީއަށް އިންތިޚާބުކުރުމަށް ހަމަޖެހިފައިވަނީ އެންމެ މެންބަރެކެވެ.
މި މަގާމުތަކަށް ކުރިމަތިލުމަށް އެދޭ މީހުންނަށް ޖަނަވަރީ 06 ވާ ހޯމަ ދުވަހުގެ 14:00 ގެ ނިޔަލަށް އީސީއިން ވަނީ ފުރުސަތު ހުޅުވާލައިފައެވެ.
އެޕްލިކޭޝަން ފޯމު ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށެވެ. އެޕްލިކޭޝަން ފޯމު އީސީގެ ވެބްސައިޓުން ލިބެން ހުންނާނެއެވެ.
ފޯމު މެއިލްކުރާނީ އެ ކޮމިޝަނުގެ [email protected] މެއިލް އަށް ކަމަށް އީސީއިން ވަނީ ބުނެފައެވެ.
މި ލިޔުން ކިޔާލުމުން
