ހޮނިހިރު ދުވަހުގެ ރޭ ޔަމަނުން އިސްރާއީލުގެ ވެރިރަށް ޓެލް އަވީވް އަށް މިސައިލް ހަމަލާއެއް ފޮނުވާލައިފިއެވެ.
މި ހަމަލާއަށްފަހު، ޔަމަނުގައި ހަރަކާތްތެރިވާ އީރާނުގެ ހަނގުރާމަވެރި ޖަމާޢަތެއްކަމަށްވާ, ހޫތީން ބުނެފައިވަނީ އިޒްރޭލުގެ މިލިޓަރީ ސައިޓަކަށް އަމާޒްކޮށް "ފަލަސްޠީން 2" ނަމަކަށް ކިޔާ މިސައިލެއް ފޮނުވާލައިފައިވާ ކަމަށެވެ. މި ހަމަލާއަކީ ހޫތީން ދީފައިވާ ހަމަލާއެއް ކަމަށް އެމީހުންނާއި އިސްރާއިލުން ވެސް ވަނީ ބުނެފައެވެ.
ފޮނުވައިލި މިސައިލް އަމާޒުވެފައިވަނީ ޓެލް އަވީވްގެ ޔާފާ ސަރަހައްދަށެވެ. ހަމަލާ ދެވުނުތާ ކުޑަ އިރުކޮޅެއްގެ ތެރޭގައި އެ ސަރަހައްދުން އިސްރާއިލްގެ ސިފައިންގެ ވެހިކަލްތަކާއި ވައިގެ އުޅަނދުތައް ހަރަކާތްތެރިވާން ފެށިކަމުގައިވީ ނަމަވެސް މި ހަމަލާ ހުއްޓުވުމުގައި ވަނީ ނާކާމިޔާބުވެފައެވެ.
އިސްރާއީލްގެ އިމަޖެންސީ ސާރވިސްތަކުން ބުނެފައިވަނީ 12 އަށްވުރެ ގިނަ މީހުންނަށް ކުދިކުދި އަނިޔާތައް ވެފައިވާ ކަމަށާއި، ނަމަވެސް އެއްވެސް މީހަކު މި ހާދިސާގައި މަރުވެފައިނުވާ ކަމަށެވެ.
އިސްރާއީލްގެ ދެވަނައަށް އެންމެ ބޮޑު ސިޓީ ކަމަށްވާ ޓެލް އަވީވްއަކީ އެ ޤައުމުގެ ވިޔަފާރި އަދި ޑިޕްލޮމެޓިކް މަރުކަޒެވެ. އިސްރާއީލްގެ ފުޅާ ވައިގެ ދިފާޢީ ނިޒާމުގެ ސަބަބުން، މި ހިސާބުގެ ކަނޑުއައްސޭރިއަށް އަމާޒުކޮށް ފޮނުވާ މިސައިލްތައް ކާމިޔާބު ކުރެވެނީ މަދު ފަހަރަކުއެވެ.
ފާއިތުވި އަހަރުގެ އޮކްޓޯބަރު މަހު އިސްރާއީލުން ޣައްޒާގައި ހަނގުރާމަ ފެށުނީއްސުރެ، އެ ޤައުމަށް ވަނީ ލުބުނާންގެ ހިޒްބުﷲ އަދި ޔަމަނުގެ ހޫތީން ފަދަ އީރާނުގެ ބާރު ހިނގާ މިލިޓެންޓް ގްރޫޕްތަކުންނާއި، އަދި އީރާނުން ސިދާ އިސްވެ ތިބެ ގިނަ މިސައިލް ހަމަލާތަކެއް ދީފައެވެ. މި ހަމަލާތަކުގެ ތެރެއިން ގިނަ އަދަދެއްގެ ހަމަލާތައް އިސްރާއިލްގެ ވައިގެ ދިފާޢީ ނިޒާމުން ވަނީ ހުއްޓުވާފައެވެ.
އިސްރާއީލުން ޣައްޒާއަށް, ބޮންއެޅުމުގެ ސަބަބުން ދިހަ ހާހަށް ވުރެ ގިނަ މީހުން މަރުވެ، އިންސާނީ ކާރިސާއެއް ކުރިމަތިވެފައިވާއިރު، ލުބްނާނަށް އެ ޤައުމުން ދިން ހަމަލާތަކުގައި 4,000 އަށް ވުރެ ގިނަ މީހުން ވަނީ މަރުވެފައިވެއެވެ.
މި ލިޔުން ކިޔާލުމުން
