ދުންފަތް ކޮންޓްރޯލުކުރުމާބެހޭ ގާނޫނުގެ ދަށުން ރާއްޖޭގައި ވޭޕް ބޭނުންކުރުން މަނާކުރި ފަހުން އެކަން ކުރި ހަތަރު މީހަކު ޖޫރިމަނާކޮށްފައިވާ ކަމަށް ފުލުހުންގެ ޚިދުމަތުން މިއަދު ބުނެފިއެވެ.
މި މަހުގެ 15 ވީ އާދިއްތަ ދުވަހު އަމަލުކުރަން ފެށި ގާނޫނުގައިވާ ގޮތުން، ވޭޕާއި، އެފަދަ އުފެއްދުމެއް ބޭނުންކޮށްފި މީހަކު 5,000 ރުފިޔާއިން ޖޫރިމަނާ ކުރެވޭނެއެވެ.
ފުލުހުން މިއަދު ބުނީ ދުންފަތް ކޮންޓްރޯލުކުރުމާބެހޭ ގާނޫނާ ޚިލާފުވެގެން އިއްޔެގެ ނިޔަލަށް ހަތަރު މީހަކު ޖޫރިމަނާކޮށްފައިވާ ކަމަށެވެ. ޖޫރިމަނާކޮށްފައިވަނީ ގާނޫނާ ޚިލާފުވި ކޮންމެ މީހަކު 5,000 ރުފިޔާއިންނެވެ. އެއީ ޖުމްލަ 20,000 ރުފިޔާއެވެ.
ދުންފަތް ކޮންޓްރޯލްކުރުމާބެހޭ ގާނޫނާ އެއްގޮތްވާ ގޮތުގެ މަތިން، އިލެކްޓްރޯނިކް ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތްތައް ވިއްކުމާއި، ހިލޭ ދިނުމާއި، ބެހުމާއި، އަދި އެކަކު އަނެކަކަށް ދޭ ފަރާތްތަކާއި، މިފަދަ އާލާތްތައް ބޭނުންކުރާ ފަރާތްތަކާ ދެކޮޅަށްވެސް ގާނޫނީ ފިޔަވަޅު އެޅުމުގެ މަސައްކަތް ކުރަމުން އަންނައިރު، ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވޭނެ ކަމަށް ފުލުހުން ވަނީ ބުނެފައެވެ. މި މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައިވާނެއެވެ.
ގާނޫނުގައިވާ ގޮތުން، ވޭޕްކުރަން ބޭނުންކުރާ އާލާތްތަކާއި، އެކަމަށް ތައްޔާރުކޮށްފައިވާ އުފެއްދުންތައް ރާއްޖެ އެތެރެކޮށްފިނަމަ 50,000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓު ނުވަތަ ވޭޕްގެ އާލާތަކަށް 10,000 ރުފިޔާގެ މަގުން ޖޫރިމަނާކުރެވޭނެއެވެ.
މީގެއިތުރުން ދުންފަތް ބޭނުންކުރުމަށް އެފަަދަ އާލާތެއް ނުވަތަ އުފެއްދުމެއް ވިއްކައިފިނަމަ 20,000 ރުފިޔާއިން ޖޫރިމަނާކުރަން ކަނޑައަޅާފައިވާއިރު، ވިއްކި ކޮންމެ އެއްޗަކަށް 10,000 ރުފިޔާއިން ޖޫރިމަނާކުރުމަށާއި، ހިލޭ ބަހައިފިނަމަ 10,000 ރުފިޔާއިން ޖޫރިމަނާކުރުމަށް ކަނޑައަޅާފައިވެއެވެ. އެފަދަ އެއްޗެއް ވިއްކީ ކުޑަކުއްޖަކަށް ކަމުގައިވާނަމަ އެ މީހަކު 50,000 ރުފިޔާއިން ޖޫރިމަނާކުރަން ވަނީ ކަނޑައަޅާފައެވެ.
މި ލިޔުން ކިޔާލުމުން
