ރަޝިޔާގެ ސީނިއަރ ޖެނެރަލް އިގޯރ ކިރިލޮވް އަދި އޭނާގެ އެހީތެރިޔާ މޮސްކޯގައި މަރައިލި މައްސަލައިގައި އުޒްބެކިސްތާނުގެ 29 އަހަރުގެ މީހަކު ހައްޔަރުކޮށްފިއެވެ.
މިދިޔަ އަންގާރަ ދުވަހުގެ ހެނދުނު ރަޝިޔާގެ ނިއުކްލިއަރ ޑިފެންސް ފޯރސްގެ ވެރިޔާ ލެފްޓިނަންޓް ޖެނެރަލް އިގޯރ ކިރިލޮވް، މަރާލައިފައި ވަނީ އެނާގެ އެޕާރޓްމެންޓް ބްލޮކް ބޭރުގައި ހުއްޓާ, ސްކޫޓަރެއްގައި އެއްޗެއް ގޮއްވާލައިގެންނެވެ.
ރަޝިޔާގެ ސެކިއުރިޓީ ސަރވިސްއިން ބުނެފައިވަނީ މި މައްސަލާގައި ހައްޔަރުކޮށްފައިވާ މީހާގެ ނަން، ސަލާމަތީ ސަބަބުތަކަށްޓަކައި މިވަގުތު ހާމަނުކުރާނެ ކަމަށެވެ.
ސަރުކާރުގެ މީޑިއާ އޭޖެންސީތަކުން ހާމަކޮށްފައިވާ މަޢުލޫމާތައް ބިނާކޮށް އެނގިފައިވާ ގޮތުގައި އޭނާ ރެކްރޫޓްކޮށްފައި ވަނީ ޔުކްރެއިންގެ އިންޓެލިޖެންސްއިނެވެ.
ޔޫކްރެއިންގެ ސެކިއުރިޓީ ސަރވިސްއިން ވަނީ ޖެނެރަލްގެ މަރުގެ ފަހަތުގައި އެމީހުން ތިބިކަމަށް ކުރިން ވެސް އެއްބަސްވެފައެވެ. އަދި އެއީ އެމީހުން އަމާޒުކޮށްގެން ދީފައިވާ ހަމަލާއެއް ކަމަށްވެސް ވަނީ އެއްބަސްވެފައެވެ.
މީގެއިތުރުން ޔޫކްރެއިނުން ވަނީ, 54 އަހަރުގެ ކިރިލޮވް މަރައިލުމުގެ ކުރީ ދުވަހު އޭނާގެ މައްޗަށް ޣައިރު ހާޒިރުގައި ދަޢުވާކޮށް، އޭނާއަކީ މަނާކުރެވިފައިވާ ކެމިކަލް ހަތިޔާރު ގިނަ އަދަދަކަށް ބޭނުންކުރުމުގެ ޒިންމާ އުފުލަންޖެހޭ ފަރާތެއް ކަމަށް ބުނެފައެވެ. ނަމަވެސް ރަޝިޔާއިން މި ތުހުމަތުތައް ދޮގުކުރެއެވެ.
ރަޝިޔާގެ އޮފިޝަލުން ވަނީ ކިރިލޮވް މަރާލުމުގައި ބައިވެރިވި ފަރާތްތައް ހޯދައި އަދަބު ދޭނެ ކަމަށް ވައުދުވެފައެވެ.
މި ލިޔުން ކިޔާލުމުން
