އިސްރާއީލުން ޣައްޒާގައި ހިނގަމުންދާ ހަނގުރާމައާ ގުޅިގެން, އަޔަލެންޑާއި އިސްރާއީލްގެ ގުޅުން ހީނަރުވެ, އަޔަލެންޑުގައި ހުރި އިސްރާއިލްގެ އެމްބަސީ ބަންދުކޮށްފިއެވެ.
އިސްރާއީލުގެ ފޮރިން މިނިސްޓަރު ބުނެފައިވަނީ އެމްބަސީ ބަންދުކުރުމަށް ނިންމާފައިވަނީ އަޔަލެންޑުން އިސްރާއީލާ މެދު އަޅާފައިވާ ހައްދުފަހަނައަޅާފައިވާ ސިޔާސަތުތަކުގެ ސަބަބުން ކަމުގައެވެ. މެއި މަހު، އިސްރާއީލުން ޑަބްލިންގައި ހުރި އެ ޤައުމުގެ އެމްބެސެޑަރު އަނބުރާ ގެނެސްފައިވަނީ ނޯވޭ، ސްޕެއިން އަދި ސްލޮވީނިއާއާ އެކު އަޔަލެންޑުން ފަލަސްތީނަކީ ވަކި ދައުލަތެއްގެ ގޮތުގައި ގަބޫލުކުރާނެކަމަށް ކުރި ޢިއުލާނާ ގުޅިގެންނެވެ.
އަޔަލެންޑްގެ ކެބިނެޓުން ވަނީ ފާއިތުވި ހަފްތާގައި އިންޓަރނޭޝަނަލް ކޯޓު އޮފް ޖަސްޓިސްގައި އިސްރާއީލާ ދެކޮޅަށް ސައުތު އެފްރިކާއިން ހުށަހަޅާފައިވާ މައްސަލައިގައި ރަސްމީކޮށް އިންޓަރވީން ކުރުމަށް ނިންމާފައެވެ. މި މައްސަލައިގައި އިސްރާއީލުން ޣައްޒާގައި ނަސްލު ނައްތާލުމަށް މަސައްކަތް ކޮށްފައިވާ ކަމަށް ތުހުމަތުކޮށްފައިވެއެވެ. ނަމަވެސް, އިސްރާއީލުން މިކަމާ ދެކޮޅު ހަދައެވެ.
އެމްބަސީ ބަންދުކުރުމާ ގުޅޭ ގޮތުން އިސްރާއީލުގެ ފޮރިން މިނިސްޓަރު ދެއްވި ބަޔާނުގައި އިތުރަށް ބުނެފައިވަނީ އަޔަލެންޑުން އިސްރާއީލާއެކު އޮތް ގުޅުމުގެ ހުރިހާ ރަތް ރޮނގެއް ފަހަނައަޅާފައިވާ ކަމަށެވެ.
އިސްރާއީލުގެ މި އިޢުލާނުގެ ކުރިން، އަޔަލެންޑްގެ ބޮޑުވަޒީރު ސައިމަން ހެރިސް އެކްސްގައި ބުނެފައިވަނީ އެމްބަސީ ބަންދުކުރުމަކީ ވަރަށް ހިތާމަހުރި ކަމެއް ކަމަށާއި، އަޔަލެންޑަކީ އިސްރާއީލާ ދެކޮޅު ޤައުމެއްކަމަށް ބުނާ ބުނުން ދޮގުކުރާ ކަމަށެވެ.
މި ލިޔުން ކިޔާލުމުން
