ޕަބްލިކް ސަރވިސް މީޑިއާ (ޕީއެސްއެމް) ގެ ޗެނަލްތަކުން ގެނެސްދިން ކޮންޓެއްޓެއްގައި ކީރިތި ޤުރްއާނުގެ ބައެއް އުނިވީ ކޮންޓެންޓް އެޑިޓުކުރުމުގެ ސަބަބަކުން ނޫން ކަމަށް އެ ކުންފުނިން މިއަދު ބުނެފިއެވެ.
ރައީސް ޑރ. މުޙައްމަދު މުޢިއްޒު އއ.ރަސްދުއަށް ކުރެއްވި ދަތުރުފުޅުގައި ބޭއްވި ޖަލްސާ ފެށުމުގެ ގޮތުން ޤުރްއާން ކިޔެވިއިރު، ޕީއެސްއެމްއިން އެ ޖަލްސާ ލައިވްކުރީ ޤުރްއާނުން ބައެއް އުނިކުރުމަށްފަހު ކަމަށް ބުނެ ސަރުކާރާ އިދިކޮޅު ފަރާތްތަކުން އަންނަނީ ފާޑުކިޔަމުންނެވެ.
މި މައްސަލާގައި ޕީއެސްއެމްއިން ނެރުނު ބަޔާނެއްގައި ބުނީ ކޮންޓެންޓް ލައިވްކުރަން ފަށާފައިވަނީ ޕީއެސްއެމް ނިއުސްގެ ޚަބަރު ކޮންޓްރޯލު ރޫމުން ކަމަށާއި، އެއަށްފަހު ސިގްނަލް އެ ކުންފުނީގެ މައި ކޮންޓްރޯލު ރޫމަށް ބަދަލުކުރެވިފައިވާ ކަމަށެވެ. އަދި އެއް ކޮންޓްރޯލު ރޫމުން އަނެއް ކޮންޓްރޯލު ރޫމަށް ސިގްނަލް ބަދަލުކުރުމަކީ އާންމު ގޮތެއްގައި ކުރާ ކަމެއް ކަމަށާއި، ނަމަވެސް ސިގްނަލް ބަދަލުކުރާއިރު، މީހަކު ވާހަކަ ދައްކަމުންދާ ވަގުތެއްގައި ސިގްނަލް ބަދަލު ނުކުރާ ކަމަށެވެ.
އެހެންނަމަވެސް ހަވާލާދެވުނު ކޮންޓެންޓް ލައިވްކޮށް ގެނެސްދިންއިރު، އެއް ކޮންޓްރޯލު ރޫމުން އަނެއް ކޮންޓްރޯލު ރޫމަށް ސިގްނަލް ބަދަލުކުރީ ޤުރްއާން ކިޔަވަމުން ދަނިކޮށް ކަމަށާއި، މިއީ އާންމު ގޮތެއްގައި ކުރާ ކަމެއް ނޫން ކަމަށެވެ.
ޤުރްއާނުގެ ބައެއް އުނިވީ ކޮންޓްރޯލް ރޫމުގައި އެވަގުތު ޑިއުޓީގައި ތިބި މުވައްޒަފުންގެ އިހުމާލުން ކަމަށާއި، އެ މުވައްޒަފުން މާފަށް އެދިފައިވާ ކަމަށް ޕީއެސްއެމްއިން ބުންޏެވެ.
ޕީއެސްއެމްއިން ބުނީ ޚަބަރު ކޮންޓްރޯލު ރޫމާއި، މައި ކޮންޓްރޯލު ރޫމުުގައި އެވަގުތު ޑިއުޓީގައި ތިބި މުވައްޒަފުން މިހާރު އެ މީހުން ކުރަމުން އައި މަސައްކަތުން އެކަހެރިކޮށްފައިވާ ކަމަށެވެ.
އަދި މިފަދަ ކަމެއް ތަކުރާރުނުވާނެ ގޮތަަށް ކަންކަން އިންތިޒާމު ކުރަމުންދާނެ ކަމަށް އެ ކުންފުނިން ވަނީ ބުނެފައެވެ.
މި ލިޔުން ކިޔާލުމުން
