މަސްވެރިކަމުގެ ދަފުތަރާ ގުޅޭ ގަވާއިދު މިއަދު ގެޒެޓުގައި ޝާއިއުކޮށްފިއެވެ.
ދިވެހިރާއްޖޭގެ މަސްވެރިކަމުގެ ގާނޫނުގެ ދަށުން ފިޝަރީޒް މިނިސްޓްރީއަށް ލިބިދޭ ބާރުގެ ދަށުން ހަދައިފައިވާ މި ގަވާއިދުގެ މަގުސަދަކީ މަސްވެރިންނާއި، ފަޅުވެރިންނާއި، އޮޑިވެރިންނާއި އޮޑިދޯނިފަހަރުގެ މައުލޫމާތު ހިމެނޭ ގޮތުން އެކުލަވައިލައިފައިވާ ދަފުތަރު މެދުވެރިކޮށް، އެ ފަރާތްތަކަށް އިޖުތިމާއީ ރައްކައުތެރިކަން ކަށަވަރުކޮށްދީ، އެ ފަރާތްތަކަކީ ދައުލަތް ދަންނަ ބަޔަކަށް ހެދުމެވެ.
މި ގަވާއިދުގެ ދަށުން، މަސްވެރިކަމުގެ ދަފުތަރުގައި ރަޖިސްޓަރީކުރަން އެދި ހުށަހަޅަންވާނީ "ކެޔޮޅު"
އެޕްލިކޭޝަން މެދުވެރިކޮށެވެ. އަދި މަސްވެރިކަމުގެ ދަފުތަރުގައި އުޅަނދުގެ ވެރިފަރާތް އަދި/ނުވަތަ އޮޕަރޭޓަރު
ރަޖިސްޓަރީވުމަށްފަހު، ކެޔޮޅާއި، ފަޅުވެރިންނާއި، ބިދޭސީން ހިމެނޭހެން ރަޖިސްޓްރީކުރަންޖެހެއެވެ.
ގަވާއިދުގައިވާ ގޮތުން، ދިވެހިރާއްޖޭގެ މަސްވެރިކަމުގެ ގާނޫނުގެ އިމުގެ ތެރެއަށް ފެތޭ މަސްވެރިކަމާއި، މަސްވެރިކަމާ ގުޅުންހުރި އެންމެހައި ހަރަކާތްތަކާއި އުޅަނދުފަހަރުން ނަގަންޖެހޭ ލައިސަންސް ނެގުމަށް އެދި ހުށަހަޅަންވާނީ، މަސްވެރިކަމުގެ ދަފުތަރުގައި ރަޖިސްޓަރީވުމަށް ފަހުގައެވެ.
މި ގަވާއިދަށް އަމަލުކުރަން ފަށާ ތާރީޚުން ފެށިގެން، މިނިސްޓްރީން މަސްވެރިންނަށް އަމާޒުކޮށް ދޭ ޚިދުމަތްތައް ދިނުމުގައި، އެ ފަރާތެއް މަސްވެރިކަމުގެ ދަފުތަރުގައި ރަޖިސްޓަރީވެފައިވާކަން މިނިސްޓްރީން ކަށަވަރުކުރަން ޖެހެއެވެ. އަދި މަސްވެރިކަމުގެ ދަފުތަރުގައި ރަޖިސްޓަރީ ނުކުރާ ފަރާތްތަކުން، އެ ފަރާތްތަކުން ދަފުތަރުގައި ރަޖިސްޓަރީވާ ހިސާބުން، މިނިސްޓްރީން މަސްވެރިންނަށް އަމާޒުކޮށް ދޭ ޚިދުމަތްތައް އެ ފަރާތްތަކަށް ލިބޭނެއެވެ.
މީގެއިތުރުން ގަވާއިދުގައި ވަނީ މަސްވެރިކަމުގެ ދަފުތަރުގައި ރަޖިސްޓަރީކޮށްފައިވާ ފަރާތްތަކަށް މާލީ ޚިދުމަތްތަކާއި އިޖުތިމާއީ ޚިދުމަތްތައް ފަސޭހަކަމާއެކު ހޯދޭނެ އިންތިޒާމުތައް މިނިސްޓްރީން ފަހިކޮށްދޭންވާނެ ކަމަށެވެ.
މި ގަވާއިދުގެ 8 ވަނަ މާއްދާގެ (ހ) ގައި ވާ ގޮތުން، ގަވާއިދުގައިވާ ގޮތުން މަސްވެރިކަމުގެ ދަފުތަރުގައި ހިމަނައިފައިވާ މައުލޫމާތު ބަދަލުކުރަންޖެހޭ ހާލަތުގައި، މައުލޫމާތު ބަދަލުކުރަންޖެހޭ ދުވަހުން ފެށިގެން 7 ދުވަހުގެތެރޭގައި، "ކެޔޮޅު" އެޕްލިކޭޝަން މެދުވެރިކޮށް، އެ މައުލޫމާތު އަދާހަމަކުރުމަކީ މަސްވެރި އުޅަނދުގެ ވެރިފަރާތް އަދި/ނުވަތަ އޮޕަރޭޓަރުގެ ޒިންމާއެކެވެ. އަދި ދަފުތަރުގައި ރަޖިސްޓަރީވެފައިވާ މަސްވެރިންނާއި، ފަޅުވެރިންނާއި، އޮޑިވެރިންނާއި، އޮޑިދޯނިފަހަރުގެ މައުލޫމާތު މިނިސްޓްރީން ބަލަހައްޓައި، އަދާހަމަކުރަން ވާނެއެވެ.
8 ވަނަ މާއްދާގެ (ހ) ގައި ބަޔާންކޮށްފައިވާ މައުލޫމާތުގެ ތެރެއިން ޒާތީ މައުލޫމާތުގެ ސިއްރުކަން މިނިސްޓްރީން ހިފަހައްޓަންވާނެ ކަމަށް ގަވާއިދުގައި ވަނީ ބުނެފައެވެ. އަދި ޒާތީ މައުލޫމާތު، މިނިސްޓްރީން އެއްވެސް ފަރާތަކާ ހިއްސާ ކުރަންވާނީ، ޒާތީ މައުލޫމާތު ނިސްބަތްވާ ތިންވަނަ ފަރާތުގެ ރުހުމާއެކުގައި ކަމަށް ބުނެފައި ވެއެވެ.
މި ގަވާއިދުގައި ބަޔާންކޮށްފައިވާ ގޮތުގެ މަތީން، މަސްވެރިކަމުގެ ދަފުތަރުގައި ރަޖިސްޓަރީވުމަށް ހުށަހަޅާ މައުލޫމާތުގެ ސައްހަކަން ކަށަވަރުކުރުމަކީ މަސްވެރި އުޅަނދުގެ ވެރިފަރާތް އަދި/ނުވަތަ އޮޕަރޭޓަރުގެ ޒިންމާއެކެވެ.
މި ލިޔުން ކިޔާލުމުން
