މި އަންނަ އަހަރަކީ ރާއްޖޭގެ ހުރިހާ ރަށްތަކަށް ވެސް ތަރައްގީގެ ވަރަށް ގިނަ ފޮނިމީރުކަން ލިބިގެންދާނެ އަހަރަކަށް ވެގެންދާނެ ކަމުގެ ފުރިހަމަ ޔަގީންކަން ރައީސް ޑރ. މުޙައްމަދު މުޢިއްޒު މިއަދު ދެއްވައިފިއެވެ.
ކ.ހުރާއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ
2025 ގެ ބަޖެޓް ހަމަޖެހިފައި އޮތީ އެމަނިކުފާނު ވެވަޑައިގެންނެވި ވައުދުތައް ފުއްދޭ ގޮތަށް ކަމަށާއި، މި އަންނަ އަހަރު އަޅުގަނޑު އެންމެ އިސްކަންދެނީ މުޅި ރާއްޖޭގެ ގެދޮރުވެރިކަމަށް ކަމަށެވެ. މި އަންނަ އަހަރުގެ ބަޖެޓަކީ ބޯހިޔާވަހިކަމުގެ ބަޖެޓެއްގެ ގޮތުގައި ވެސް އެމަނިކުފާނު ސިފަކުރެއްވިއެވެ.
ރައީސް ވިދާޅުވީ ރަށްރަށުގެ ރައްޔިތުން އެދޭ ގޮތަށް، ވައުދުތައް ފުއްދެވުމަށް އިސްކަންދެއްވައިގެން ކުރިއަށް ގެންދަވާނެ ކަމަށާއި، 2025 އާއި 2026 އަކީ މިގޮތަށް ޕްލޭންކޮށްފައި އޮތް ދެ އަހަރު ކަމަށެވެ.
އެގޮތުން މި އަންނަ އަހަރު ގިނަ މަޝްރޫއުތައް ފެށޭނެ ކަމަށާއި އަދި މި އަންނަ އަހަރު ނުފެށޭ މަޝްރޫއުތައް، ދެން އަންނަ އަހަރު ފެށި، މި ދެ އަހަރު ވެގެންދާނީ، އެމަނިކުފާނު އިންތިޚާބުގައި ވެވަޑައިގެންނެވި ހުރިހާ ވައުދުތައް އަމަލީގޮތުން ފުދިގެންދާ ދެ އަހަރަށް ކަމަށް ރައީސް ވިދާޅުވިއެވެ.
އެގޮތަށް އިރާދަކުރެއްވިއްޔާ ތަރުތީބު ކުރެވިގެން މިދަނީ. މި އަހަރު މި ބޭނުންކުރަންޖެހުނީ ބޮޑު ދަރަންޏެއްގައި އަޅުގަނޑުމެން ބެދިފައި އޮތީމަ، އަޅުގަނޑުމެންގެ ގައުމުގެ އިގުތިސާދު ބަނގުރޫޓުވުމުގެ މަގުމަތީގައި އޮތީމަ، އެކަމުން ސަލާމަތްވުމަށް. ފައިސާ ޗާޕުނުކޮށް އެކަން ކުރަންޖެހުނީމަ، ވަރަށްގިނަ ކަންކަން ހަމަޔަކަށް އަޅުވަންޖެހުނު.
ނަމަވެސް އަންނަ އަހަރަކީ ހުރާއަށް ވެސް އަދި އެހެން ރަށްތަކަށް ވެސް ތަރައްގީގެ ވަރަށް ގިނަ ފޮނިމީރުކަން ލިބިގެންދާނެ އަހަރަކަށް ވެގެންދާނެ ކަމުގެ ފުރިހަމަ ޔަގީންކަން ދެއްވާ ކަމަށް ރައީސް ވިދާޅުވިއެވެ.
މި ލިޔުން ކިޔާލުމުން
