ކޮރަޕްޝަންފަދަ ފަސާދަތައް ހުއްޓުވުމަށް އަމަލާއި ބަހުން ތެދުވެރި މަސައްކަތްތަކެއް ފެށުމަށް ރައީސް ޑރ. މުޙައްމަދު މުޢިއްޒު ގޮވާލައްވައިފިއެވެ.
އެމަނިކުފާނު މިފަދައިން ގޮވައިލެއްވީ ބައިނަލްއަގުވާމީ އެންޓި-ކޮރަޕްޝަން ދުވަހާ ގުޅިގެން މީސްމީޑިއާގައި ކުރެއްވި ޕޯސްޓެއްގައެވެ.
އެގޮތުން އެމަނިކުފާނުގެ ޕޯސްޓުގައި ވަނީ ކޮރަޕްޝަނަށް މަގުފަހިވެދާނެ ކަމަކަށް ނޭދުމަށާއި، އެފަދަ ހުށަހެޅުމެއް ގަބޫލުނުކުރުމަށް ވެސް އިލްތިމާސްކުރައްވައިފައެވެ. އަދި ފަސާދަކުރުން ހުއްޓުވުމަށް އަމަލާއި ބަހުން ތެދުވެރި މަސައްކަތްތަކެއް ފެށުމަށް ގޮވާލައްވާފައެވެ.
ބައިނަލްއަގުވާމީ އެންޓި-ކޮރަޕްޝަން ދުވަސް ފާހަގަކުރަނީ ކޮންމެ އަހަރެއްގެ ވެސް ޑިސެމްބަރު 9 ގައެވެ.
މި ދުވަސް ފާހަގަކުރަނީ ކޮރަޕްޝަންގެ ސަބަބުން މުޖުތަމައު ފަސާދަވެ، ޑިމޮކްރަސީ ބަލިކަށިވެ، އިގުތިސާދީ ތަރައްގީއަށް ހުރަސްއެޅި، މުޖުތަމައުގައި ބައިބައިވުމާއި ޖަރީމާތައް ހިނގުން ހުއްޓުވުމަށް ބާރުއެޅުމުގެ ގޮތުންނެވެ.
ރައީސް ޑރ. މުޢިއްޒު މީގެކުރިން ވަނީ މި ސަރުކާރުގެ އެއްވެސް ފަރާތެއް ކޮރަޕްޝަންގެ އަމަލެއް ހިންގާކަން ސާބިތުވެއްޖެ ހާލަތެއްގައި އެ ފަރާތަކާމެދު އަޅަންޖެހޭ ގާނޫނީ ފިޔަވަޅު ފަސްޖެހުމެއްނެތި އަޅުއްވާނެކަމުގައި ވިދާޅުވެފައެވެ. ހަމައެއާއެކު ކޮރަޕްޝަނާ ގުޅޭގޮތުން މީހުން ހޭލުންތެރިކުރުމަށް ކުރެވެންހުރި މަސައްކަތްތައް އިލްމީ ފެންވަރުގައި ކުރިއަށްގެންދަވާނެ ކަމަށާއި، މި ސަރުކާރުގެ ސިޔާސަތަކަށްވާނީ، ކޮރަޕްޝަނާ ދެކޮޅަށް ކުރެވޭ ކޮންމެ ކަމެއްގައި ފުރިހަމައަށް އެއްބާރުލުންދިނުން ކަމުގައި ވިދާޅުވެފައެވެ.
މި ލިޔުން ކިޔާލުމުން
