ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ އޮފީސް ހިންގަން އަލަށް ނެގި އިމާރާތުގެ އެއްބަސްވުން ބާތިލުކުރަން ނިންމައިފި އެވެ.
މި އެއްބަސްވުން ބާތިލު ކުރަން އެންސްޕާއިން ނިންމީ މިކަމުގެ ފަހަތުގައި ކޮރަޕްޝަން ހިމެނޭ ކަމަށްބުނެ ތުހުމަތުތަކެއް އަމާޒުވުމުންނެވެ.
މިދިޔަ ބުރާސްފަތި ދުވަހުގެރޭ ބްރޯޑްކާސްޓިން ފެށި "އެމްއެމް ޓީވީ" ޗެނަލް ހިންގަނީ އެންސްޕާގެ ފައިސާ އިން ކުއްޔަށް ނަގާފައިވާ ތަނެއްގައި ކަމަށާއި އެތަނަށް ކުލި ދައްކަނީ އެންސްޕާ އިން ކަމަށް ބުނެ ދަނީ ތުހުމަތުތައް ކުރަމުންނެވެ.
މި ޓީވީ ޗެނަލަށް އެންސްޕާ އިން 34 މިލިއަން ރުފިޔާ ހަރަދު ކޮށްފައިވާ ކަމަށް ވެސް ތުހުމަތު ކޮށްފައިވެ އެވެ.
އެންސްޕާއިން މިކަމާއި ގުޅިގެން މިއަދު ނެރުނު ބަޔާނެއްގައި ބުނީ، އެ އޭޖެންސީ ހިންގަމުންދާ "މޫކައި ސުއިޓްސް" އިމާރާތް މަރާމާތުކުރުމަށްޓަކައި ހުސްކުރުމަށް އަންގާފައިވާތީ، އެ އޭޖެންސީ ހިންގާނެ ތަނެއް ހޯދުމަށް މާލީ ވުޒާރާގެ އޯޕަން ޓެންޑާ އިން ހުޅުވާލައިގެން، ކަނޑައެޅިފައިވާ ގަވައިދުތަކާއި އުސޫލުތަކުގެ މަތިން އެވޯޑްކޮށް، އެޖެންސީ ހިންގުމަށް ލިބުނު އިމާރާތުގެ ފަންގިފިލާތައް މޯލްޑިވްސް މީޑިއާ ހައުސް އިން ކުއްޔަށް ހިފުމުގެ މަސައްކަތް ކޮށްފައިވާނެ ކަމަށެވެ.
މި މުއާމަލާތާ ގުޅިގެން އެ ކުންފުނީގެ އަގު ވައްޓާލައި، ބަދުނާމުކުރުމަށް ހަގީގަތާ ޚިލާފު އެތައް ވާހަކަތަކެއް ދައްކައި، މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއްނެތް ދޮގު ވާހަކަތަކެއް ފަތުރަމުން ދިއުމުގެ ސަބަބުން އެ ކުންފުންޏަށް މާއްދީ ގޮތުންނާއި މައުނަވީ ގޮތުން ފޫނުބެދޭ ވަރުގެ ބޮޑު ގެއްލުމެއް ކުރިމަތިވެފައިވާތީ، މި އެއްބަސްވުން ނިމުމަކަށް ގެނައުމަށް އެ ކުންފުނިން ހުށަހަޅާފައިވާކަމަށް އެންސްޕާގެ ބަޔާނުގައި ބުނެފައިވެ އެވެ.
އެހެންކަމުން، މިކަމާ ގުޅޭގޮތުން މާލީ ވުޒާރާއާއި މަޝްވަރާކުރުމަށްފަހު، އެ އެއްބަސްވުން ނިމުމަކަށް ގެނައުމަށް ނިންމާފައިވާ ކަމަށްވެސް އެންސްޕާ އިން ބުނެފައި ވެއެވެ.
މިކަމާއި ގުޅިގެން އިތުރަށް ކުރަންޖެހޭ މުއާމަލާތްތައް ކުރުމާއި، އެއްބަސްވުން ނިމުމަކަށް ގެނައުމަށްފަހު ފުރިހަމަކުރަންޖެހޭ އިޖުރާތްތައް ފުރިހަމަކުރުމުގެ މަސައްކަތްތައް، މާލީ ވުޒާރާގެ އިރުޝާދުގެ ދަށުން ކުރިއަށް ގެންދަމުންދާ ކަމަށް އެންސްޕާގެ ބަޔާނުގައި ބުނެފައިވެ އެވެ.
މި މައްސަލަ ބަލައިދިނުމަށް އެދި އެންސްޕާ އިން ވަނީ އޭސީސީއަށް ވެސް ހުށަހަޅާފަ އެވެ.
މި ލިޔުން ކިޔާލުމުން
