އޭސީސީ ރެކްރިއޭޝަން ކުލަބުގެ ހިންގާ ކޮމިޓީން، އެ ކުލަބުގެ ހިނގަމުން މިދާ ދައުރުގެ މާލީ ހިސާބުތަކާ ގުޅިގެން މިހާރު ކުރަމުންގެންދާ އޮޑިޓާ ގުޅިގެން، 12 ނޮވެންބަރު 2024 ގައި، އެ ކުލަބުގެ ފާއިތުވި ދައުރާއި ހިނގަމުން މިދާ ދައުރުގެ ރައީސާ ގުޅުންހުރި ބައެއް ކަންކަން ފާހަގަކޮށް އެ ކޮމިޝަންގެ ސަމާލުކަމަށް ގެނެސްފައިވާތީ، އެކަމާ ގުޅިގެން އަޅަންޖެހޭ ފިޔަވަޅުތައް އަޅައި މައްސަލައެއް ބަލަމުންގެންދާ ކަމުގައި އެންޓި-ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
އޭސީސީން މިއަދު ނެރުނު ބަޔާނެއްގައި ބުނެފައިވާ ގޮތުން މި މައްސަލައާ ގުޅިގެން ކޮމިޝަނުން ވަނީ އެ މުވައްޒަފު ކޮމިޝަނުގައި އަދާކުރާ މަޤާމުގެ ހައިސިއްޔަތުން ކުރަންޖެހޭ އެންމެހައި މަސައްކަތްތަކުން ދުރުކޮށް ސަސްޕެންޑްކޮށް، މަޤާމާ ސީދާ ގުޅުން ނެތް އެންމެހައި މަސްއޫލިއްޔަތުތަކުންވެސް ދުރުކޮށްފައެވެ. އަދި، އެ މުވައްޒަފަކީ ކޮމިޝަންގެ ތަޙުޤީޤުތަކާ ގުޅުންހުރި އެއްވެސް މަސައްކަތެއް، އެއްވެސް އިރެއްގައި ކޮށްފައިވާ މުވައްޒަފެއް ނޫން ކަމުގައިވެސް އޭސީސީން ހާމަކުރެއެވެ.
އެ ބަޔާނުގައި އިތުރަށް ބުނެފައިވާ ގޮތުން މިކަމާ ގުޅިގެން ކުލަބުގެ އާންމު މެންބަރުންނަށް ކުލަބުގެ ހިންގާ ކޮމިޓީން މަޢުލޫމާތު ދީ، މިކަން ދިވެހި ފުލުހުންގެ ޚިދުމަތުގެ ސަމާލުކަމަށް ގެނެސް މައްސަލަ ވަނީ ހުށަހަޅައިފައެވެ.
އޭސީސީން ބުނީ އެ ކޮމިޝަންގެ ރެކްރިއޭޝަން ކުލަބަކީ އެ ކުލަބުގެ މެންބަރުންގެ އަތުން ޗަންދާ ނަގައިގެން، ކޮމިޝަނުގެ މާލީ ކަންކަމާ މުޅިން ވަކިން ހިންގާ ކުލަބެއް ކަމަށެވެ. އަދި، ކޮމިޝަނުގެ މުވައްޒަފުންގެ ސުލޫކާ ގުޅޭ ކަންކަމުގައި ވަޒީފާއާބެހޭ ޤާނޫނުގެ އިމުގެ ތެރެއިން އެޅޭނެ ފިޔަވަޅުތައް އަބަދުވެސް އަޅަމުންގެންދާ ކަމަށާއި، މި މައްސަލައިގައި އެގޮތަށް ޢަމަލުކުރަމުންގެންދާކަން އެ ކޮމިޝަނުން ވަނީ ފާހަގަކޮށްފައެވެ.
މި ލިޔުން ކިޔާލުމުން
